Rev 7 | ATA | STEP | Anu mululusou sakisaki muxatele vile mukalu, la eni emaisi'a ta angelo tami'a mitulutulu no xalee lia kusikusinou tami'a. Ane'i mitulutulu sou mitaluxu atume iou tami'a, la uilisou lia mo luaki xe ovuovu uasi.

a 7:1Iel 49:36; Tan 7:2

b 7:3Ese 9:4, 6; Pal 9:4

c 7:4Pal 14:1, 3

d 7:10Pal 5:6-7

e 7:12Pal 5:12

f 7:14Tan 12:1; Mat 24:21

g 7:16Ais 49:10

h 7:17Lex 23:2; Ais 25:8; Pal 21:4

Revelation of John 7

Lataua Musosovosi'a ta Isilaeli 144,000

1 ^aAnu mululusou sakisaki muxatele vile mukalu, la eni emaisi'a ta angelo tami'a mitulutulu no xalee lia kusikusinou tami'a. Ane'i mitulutulu sou mitaluxu atume iou tami'a, la uilisou lia mo luaki xe ovuovu uasi. 2 Mo eni emaisou angelo vile molu no xalee ane aso utelo no anu unene'e la mutetelisou sosovo noxou Lataua ane umauli. Anu mune'e la mu'ava toxoxa'a mulai noxi'a ta angelo tami'a e Lataua mulosi'a xavi sou i'oxo masuanu lia ilou luaki. 3 ^bAloxo 'o, “Ngingi ngaxolu 'o, mo nenge nenge'a tateinu sosovo no 'alaie'i ta mitema sou xaixai vitanisi noxou Lataua noxinge tei 'o. Xe ukalu, la sou ngingi nga'oxo masuanu lia ilou luaki mo ovuovu.” 4 ^cMu'ava aloxo ne mukalu, la eni elomusou itiitisi'a ane'i ane mino'u sosovo ne muxali loxo 144,000 no anu mata noxi'a ta Isilaeli mukalusi.

5 Mata noxou Iudasi mino'u sosovo itiitisi'a muxali loxo 12,000.

Mo mata noxou Lubeni 12,000 mo mata noxou Gado 12,000.
6 Mo mata noxou Aseli 12,000 mo mata noxou Napitali 12,000
mo mata noxou Manase 12,000
7 mo mata noxou Simeoni 12,000 mo mata noxou Levi 12,000
mo mata noxou Isikali 12,000
8 mo mata noxou Sevuloni 12,000 mo mata noxou Iosepu 12,000
xe mata noxou Beniamini 12,000.

Ta Mitema Tavu'alo Mitaanu Tokolomo Kea

9 Eni emaisou itiitisi'a ta Isilaeli mukalu xe emalei la, emaisi'a ta mitema tavu'alo manina umomomo sou taitisi'a uasi ane mata noxi'a iouiou mo vasime'a kaukavuxu iouiou mo vaikalai'a iouiou no xalexalee tuatuala mukalusi. Ane'i mitutulu no talaxa'a itema muxolu no luu ne ilou Sipsip 'Olu, la mitaanu tokolomo kea mulalusi xe mitetelisou xoolou volovoloxu no avo'a. 10 ^dLa ane'i mi'ava tatila aloxo 'o,

“Lataua noxinge ane muxolu no luu ilou Sipsip 'Olu upamaulinenge.”
11 Ane'i mi'ava tatila aloxo ne, la ta angelo ane mitulu mixixaone'i itema muxolu no luu ilo'a ta tatila mo ta mii tami'a milapau milu'elai no talaxo itema muxolu no luu ne sou milotu noxou Lataua. 12 ^eIa mivikala aloxo 'o,

“Manina lexe nenge ta'osasou Lataua noxinge mo ta'itinu ualasou
mo talemolu laixe noxou xe ta taxanu no voxovoxo utotomu mo kaluxu uasi.
Xo anu itema sou lavulavu mo xavi noxou ne xaviinu misevile.
Manina.”
13 La vile noxi'a ta tatila mutali'isilo aloxo 'o, “Ane'i ta 'ei e mitaanu tokolomo kea mo me'a ne'ei?” 14 ^fLa ekolinu aloxo 'o, “Tila, nini nelavusi'a.” La anu muvikala lexe, “Ane'i ta mitema ne, ane'i miuaulixu tu'utu'umaxu toxotoxoxa'a la mi'uinu tokolomoi'a no anu sialuxu Sipsip 'Olu la muxali kea. 15 La sou ane'i milai mixolu no luu talaxu Lataua sou ixaxai noxou no taasou no aso xe no 'olovoxo. La itema ane muxolu no luu ne uxolu noxi'a. 16 ^gLa ane'i isolixa'a mo isoliu lexa la uasi. Mo aso umomomo sou uve'a mo ialuxa'a la uasi. 17 ^hXo Sipsip 'Olu e muxolu no nixi no luu ne anu usaxila'a loxo itema sou usaxila'a ta sipsip mo anu uolene'i ilai no lexa sou mauli iou. Xe Lataua uiasou ie'i lexaxu.”